സമരിറ്റന്‍ ഭവനിലെ അന്തേവാസികളോടൊപ്പം ക്രിസ്തുമസ് ആഘോഷിച്ച് സ്‌കൂള്‍ വിദ്യാര്‍ത്ഥികള്‍

സമരിറ്റന്‍ ഭവനിലെ അന്തേവാസികളോടൊപ്പം ക്രിസ്തുമസ് ആഘോഷിച്ച് ദ്വാരക എ.യു.പി. സ്‌കൂള്‍ വിദ്യാര്‍ത്ഥികള്‍.

ദ്വാരക എ.യു.പി. സ്‌കൂൾ നല്ലപാഠം കൂട്ടുകാർ അധ്യാപകരോടും പി.ടി.എ അംഗങ്ങളോടുമൊപ്പം ക്രിസ്ത്മസ് സന്ദേശവുമായി മാനന്തവാടി സമരിറ്റൻ ഭവൻ സന്ദർശിച്ചു. കുട്ടികളുടെ സാമിപ്യം അന്തേവാസികളിൽ പോയകാലത്തിന്റെ സ്മരണകളുണർത്തി . കരോൾ ഗാനങ്ങളും കലാപരിപാടികളും ആഘോഷത്തിന് മാറ്റ് കൂട്ടി .കുട്ടികള്‍ സമാഹരിച്ച നിത്യോപയോഗ സാധനങ്ങള്‍,ഭക്ഷ്യ  വസ്തുക്കള്‍ എന്നിവ അന്തേവാസികള്‍ക്ക് നല്‍കി.കേക്ക് വിതരണത്തിന് ശേഷം വിവിധ കലാപരിപാടികളും നടത്തി. ഹെഡ്മാസ്റ്റര്‍ സജി ജോണ്‍, ജോണ്‍സന്‍ കുര്യാക്കോസ്,വനജ.കെ,മാര്‍ഗരറ്റ് സി.ജെ, എം.പി.ടി. പ്രസിഡന്റ് ഷീജ മാത്യു, വിദ്യാർത്ഥികളായ മെറിൽ, ആമിന, ജോയൽ എന്നിവര്‍ സംസാരിച്ചു. പ്രായമായവരെ സംരക്ഷിക്കേണ്ടത് നമ്മുടെ കടമയാണെന്ന ബോധ്യം കുഞ്ഞുമനസ്സുകളിൽ ഉറപ്പിക്കുവാൻ ഈ സന്ദർശനം സഹായിച്ചു.

ഇത് 'നമ്മ വായനശാല' ഉദ്ഘാടനം ചെയ്തു

ഇത് 'നമ്മ വായനശാല' ഉദ്ഘാടനം ചെയ്തു

ദ്വാരക എ.യു.പി സ്‌കൂളിലെ  നല്ലപാഠം യൂണിറ്റിന്റെ നേതൃത്വത്തിൽ അധ്യാപകരും കുട്ടികളും കൂടിചേര്‍ന്ന് പത്തില്‍കുന്നു കോളനിയില്‍ വായന കൂട്ടായ്മ ആരംഭിച്ചു.നിരവധി പുസ്തകങ്ങള്‍ ഉള്‍കൊള്ളുന്ന ഈ സംരംഭം 'നമ്മ  വായനശാല’ എന്ന പേരിലാണ് അറിയപ്പെടുന്നത്. കോളനിയിലെ കുട്ടികള്‍ വളരെ താല്‍പ്പര്യത്തോടെയാണ് ഈ വായനശാലയെ സ്വീകരിച്ചത്. നല്ലപാഠം കൂട്ടുകാർ പ്രത്യേകം തയ്യാറാക്കിയ പുസ്തക ഷെൽഫ് കോളനിയിൽ പഠനവീട്ടിൽ സ്ഥാപിച്ചു .സ്‌കൂള്‍ ഹെഡ്മാസ്റ്റര്‍ സജി ജോണ്‍ പത്തില്‍കുന്നു കോളനിയിലെ പഠനവീട് അധ്യാപികയായ അമ്മിണി ടീച്ചര്‍ക്ക് പുസ്തകം കൈമാറി ഉത്ഘാടന കര്‍മ്മം നിര്‍വഹിച്ചു.ജോണ്‍സന്‍ കുര്യാക്കോസ്,വനജ.കെ, അമ്മിണി,ഷില്‍സണ്‍ മാത്യു , നോഡൽ ഓഫീസർ  ഹസീന കെ.എം. എന്നിവര്‍ സംസാരിച്ചു. കേക്ക് വിതരണവും നടത്തി. പിന്നോക്ക വിഭാഗക്കാരായ വിദ്യാർത്ഥികൾക്ക് ആകർഷകമായ നിരവധി ആനുകാലിക ബാല മാസികകളും കഥാപുസ്തകങ്ങളും ലഭ്യമാക്കികൊണ്ട് പത്തിൽകുന്നു കോളനിയിൽ വായനയുടെ വസന്തം തീർക്കാൻ നല്ലപാഠം കൂട്ടുകാർക്ക് സാധിച്ചു.

അമ്മവായന ക്വിസ്സ്'

ദ്വാരക എ.യു.പി. സ്‌കൂളിൽ നല്ലപാഠം യൂണിറ്റിന്റെ നേതൃത്വത്തിൽ നടപ്പിലാക്കുന്ന അമ്മവായന കൂട്ടായ്മയിൽ അംഗങ്ങളായവർക്ക്  ക്വിസ്സ് മത്സരം സംഘടിപ്പിച്ചു. ഇരുപതോളം അമ്മമാർ മത്സരത്തിൽ പങ്കെടുത്തു. ഷീജ മാത്യു, അനില, ഷീന എന്നിവർ ഒന്നും, രണ്ടും, മൂന്നും സ്ഥാനങ്ങൾ  നേടി. പങ്കെടുത്ത എല്ലാവർക്കും പ്രോത്സാഹന സമ്മാനങ്ങൾ നൽകി. ഹെഡ്‌മാസ്റ്റർ സജി ജോൺ സമ്മാന വിതരണം നടത്തി. വിഷ്വൽ ക്വിസ്സ് മത്സരം അമ്മമാർക്ക് വേറിട്ട അനുഭവമായി. ശ്രീമതി വനജ കെ.  ക്വിസ്സിന് നേതൃത്വം നൽകി. നല്ലപാഠം കോർഡിനേറ്റർ ജോൺസൺ കുര്യാക്കോസ് , മദർ പി.റ്റി.എ. പ്രസിഡന്റ് ഷീജ മാത്യു , സി.സെലിൻ ജോസഫ് തുടങ്ങിയവർ സംസാരിച്ചു.

ഹിന്ദി ഭാഷാ പരിശീലനം ‘ത്സലക്’ വേറിട്ട പ്രവർത്തനവുമായി ദ്വാരക എ.യു.പി സ്‌കൂൾ

ദ്വാരക എ.യു.പി. സ്‌കൂളിൽ യു.പി. വിഭാഗത്തിലെ മുഴുവൻ കുട്ടികൾക്കും ഹിന്ദി ഭാഷയിൽ ലേഖന, വായന ശേഷികൾ ഉറപ്പിക്കുന്നതിന്റെ ഭാഗമായി പതിപ്പ് നിർമ്മാണം നടത്തി. മുഴുവൻ കുട്ടികളും സ്വന്തമായി പതിപ്പ് നിർമ്മിച്ചു. ഇതിലൂടെ അക്ഷരങ്ങൾ ഉറപ്പിക്കാനും , പദസമ്പത്ത് വർദ്ധിപ്പിക്കാനും സാധിച്ചു. പതിപ്പിന്റെ പ്രകാശനം സ്‌കൂൾ മാനേജർ റവ.ഫാദർ ജോസ് തേക്കനാടി നിർവഹിച്ചു. മികച്ച പതിപ്പ് ‘ബഗീചൻ’ (പൂന്തോട്ടം) തയ്യാറാക്കിയ മെറിൻ ബിൻ ഗ്രെയ്‌സിനെ ഹെഡ്‌മാസ്റ്റർ സജി ജോൺ അനുമോദിച്ചു. അധ്യാപകരായ മാർഗ്രറ്റ് സി ജെ , റീത്താമ്മ ജോൺ എന്നിവർ നേതൃത്വം നൽകി.

*ജൈവ പച്ചക്കറി വിളവെടുപ്പ്*

ദ്വാരക എ.യു.പി. സ്‌കൂളിൽ നല്ലപാഠം യൂണിറ്റിന്റെ നേതൃത്വത്തിൽ നടപ്പിലാക്കിയ ‘ജൈവ പച്ചക്കറി ‘ വിളവെടുപ്പ് നടത്തി. കോളിഫ്‌ളവർ, തക്കാളി, ചീര എന്നിവ കുട്ടികളുടെ ഉച്ചഭക്ഷണത്തിൽ ഉൾപ്പെടുത്തി. മികച്ച കുട്ടികർഷകനെ കണ്ടെത്താനുള്ള ഗൃഹസന്ദർശനം നടത്താന്‍ തീരുമാനിച്ചു. വിളവെടുപ്പ് ഉദ്ഘാടനം സ്‌കൂൾ മാനേജർ റവ.ഫാദർ ജോസ് തേക്കനാടി നിർവഹിച്ചു. ഹെഡ്‌മാസ്റ്റർ സജി ജോൺ , ജോൺസൺ കുര്യാക്കോസ്, സിസ്റ്റർ സെലിൻ ജോസഫ്, ജോൺസൺ പി.ജെ എന്നിവർ സംസാരിച്ചു.

NuMATS - വിജയത്തിളക്കത്തിൽ ദ്വാരക എ യു പി സ്കൂൾ.

2018-19 വർഷത്തെ ഗണിത ശാസ്ത്രാഭിരുചി പരീക്ഷയിൽ ( NuMATS ) ദ്വാരക എ യു പി സ്കൂളിലെ 3 വിദ്യാർത്ഥികൾ സംസ്ഥാന തല പരീക്ഷക്ക് അർഹത നേടി. ഗണിതം മധുരമാക്കിയ ഫയാസ് T, മുഹമ്മദ് നിഹാൽ, അർച്ചന E R എന്നീ വിദ്യാർത്ഥികളാണ് സ്കൂളിന്റെ അഭിമാനമായി മാറിയത്. ഈ നേട്ടത്തിന് അർഹരായ വിദ്യാർത്ഥികളേയും ഇവരെ പരിശീലിപ്പിച്ച അധ്യാപകരേയും സകൂൾ അസംബ്ലിയിൽ ഹെഡ്മാസ്റ്റർ സജി ജോൺ അനുമോദിച്ചു.

ശിശുദിനംആഘോഷിച്ചു

ദ്വാരക എ യു പി സ്കൂളിൽ ശിശുദിനം സമുചിതമായി ആഘോഷിച്ചു.കുട്ടികളുടെ പ്രധാനമന്ത്രി നിർമൽ മാത്യു ശിശുദിന സന്ദേശം നൽകി. സ്പീക്കർ മെറിൽ ബിൻ ഗ്രെയ്സ് അധ്യക്ഷത വഹിച്ചു. ചടങ്ങിൽ മേഘ ജോയി സ്വാഗത ഭാഷണം നടത്തി. വിവിധ മത്സര വിജയികൾക്ക് പാസ്റ്ററൽ സെന്റർ ഡയറക്ടർ റവ.ഫാദർ പോൾ വാഴപ്പള്ളി സമ്മാനങ്ങൾ നൽകി. ചൈൽഡ് റിപ്പോർട്ടറായി തിരഞ്ഞെടുക്കപ്പെട്ട ഏഴാം ക്ലാസ് വിദ്യാർത്ഥിനി അഞ്ജന സുരേഷ് ആശംസകൾ അറിയിച്ചു. അക്ഷജ് കെ ജോണി നന്ദി അർപ്പിച്ചു. തുടർന്ന് കുട്ടികൾ അണിനിരന്ന വർണശബളമായ റാലിക്ക് വാർഡ് മെമ്പർ സുബൈദ പുളിയോടിയിൽ, എച്ച്.എം ശ്രീ . സജി ജോൺ, പി.റ്റി.എ പ്രസിഡണ്ട് ശ്രീ മനു കുഴിവേലി, എം.പി.റ്റി.എ പ്രസിഡണ്ട് ശ്രീമതി.ഷീജ മാത്യു, വൈസ് പ്രസിഡണ്ട് ശ്രീ.തോക്കൻ മമ്മൂട്ടി, എം.പി.റ്റി.എ വൈസ് പ്രസിഡണ്ട് ശ്രീമതി. മിനി സജി , എക്സിക്യൂട്ടീവ് അംഗങ്ങൾ എന്നിവർ നേതൃത്വം നൽകി. നാസിക് ബാന്റിന്റെ അകമ്പടി റാലിക്ക് മാറ്റുകൂട്ടി. പി.റ്റി.എ യുടെ നേതൃത്വത്തിലാണ് കുട്ടികൾക്ക് വിഭവസമൃദ്ധമായ ഉച്ചഭക്ഷണം നൽകിയത്.

ദ്വാരക എ.യു.പി സ്ക്കൂളില്‍ ഉറുദു ദിനാചരണം സംഘടിപ്പിച്ചു.

..................
ദ്വാരക എ.യു.പി സ്ക്കൂളില്‍ ഉറുദു ദിനാചരണം സംഘടിപ്പിച്ചു. പ്രശസ്ത ഉറുദു കവി മുഹമ്മദ് അല്ലാമാ ഇഖ്ബാലിന്റെ ജന്മദിനമാണ് ലോക ഉറുദുദിനമായി ആചരിക്കുന്നത്. ഗസലിന്റെ ഭാഷയായ ഉറുദുവില്‍ രചിച്ച സാരെജഹാംസെ അച്ഛാ എന്ന ഗാനത്തോടെ ഉദ്ഘാടന ചടങ്ങ് ആരംഭിച്ചു. പ്രധാനാദ്ധ്യാപകന്‍ ശ്രീ സജി ജോണ്‍ ഉറുദു ടാലന്റ് ടെസ്റ്റ് വിജയികള്‍ക്ക് സമ്മാനങ്ങള്‍ വിതരണം ചെയ്ത് ചടങ്ങ് ഉദ്ഘാടനം ചെയ്തു. കുമാരി മിന്‍ഷ എം ഉറുദു ദിന സന്ദേശം നല്‍കി. വിദ്യാര്‍ത്ഥികളായ റുസൈന ഫാത്തിമ, ഉവൈസ്, അദ്ധ്യാപകരായ യൂസുഫ് ബി, ജോണ്‍സന്‍ പി.ജെ തുടങ്ങിയവര്‍ ആശംസകള്‍ അര്‍പ്പിച്ചു. ശ്രീ നദീര്‍ ടി നന്ദി പറഞ്ഞു. തുടര്‍ന്ന് മുഹമ്മദ് ഇഖ്ബാലിന്റെ ഡോക്യുമെന്ററി പ്രദര്‍ശിപ്പിച്ചു.

വിദ്യാർത്ഥികൾക്ക് പോക്സോ നിയമ ബോധവൽക്കരണം നൽകി

ദ്വാരക : ദ്വാരക എ.യു.പി സ്‌കൂളിൽ കുട്ടികൾക്ക് പോക്സോ നിയമങ്ങളേക്കുറിച്ച് ബോധവൽക്കരണം നൽകി . മാനന്തവാടി കോടതിയിലെ അഭിഭാഷക ശ്രീമതി എൽബി മാത്യു ക്ലാസ്സ് നയിച്ചു. ലീഗൽ വോളന്റിയർ ശ്രീമതി ത്രേസ്സ്യ നേതൃത്വം നൽകി. ചുറ്റുപാടുകളിൽനിന്നുണ്ടാകുന്ന ചൂഷണങ്ങളെ സ്വയം അതിജീവിക്കുവാനുതകുന്നതായിരുന്നു ക്ലാസ്സ്. ഹെഡ് മാസ്റ്റർ സജി ജോൺ , ജോൺസൺ കുര്യാക്കോസ്, ഷിമിലി എൻ.എം. വനജ കെ എന്നിവർ സംസാരിച്ചു.

സി.വി രാമൻ ദിനം സമുചിതമായി ആഘോഷിച്ചു

 ദ്വാരക - ദ്വാരക   എ.യു.പി സ്കൂളിൽ ശാസ്ത്ര ക്ലബിന്റെ  ആഭിമുഖ്യത്തിൽ നവംബർ 7 ന് സി.വി രാമൻ ദിനാചരണവും മേരി ക്യൂറി ജന്മദിനവും  ശാസ്ത്ര രംഗം രൂപികരണവും സമുചിതമായി നടത്തി. റിട്ട. ഹെഡ്മാസ്റ്ററും ശാസ്ത്ര അധ്യാപകനുമായ ശ്രീ കെ എം ജോൺ ഉല്ഘാടന കർമ്മം നിർവഹിച്ചു. സി.വി രാമൻ ഡോക്യൂമെന്ററി പ്രദർശനവും, മേരി ക്യൂറി ശാസ്ത്ര സംഭാവന അവലോകനവും, ലഘു പരീക്ഷണങ്ങളും നിരവധി ശാസ്ത്രകൗതുകങ്ങളും കട്ടികൾക്ക് പുത്തൻ അറിവുകൾ പ്രധാനം ചെയ്തു. ശാസ്ത്ര സംശയം പതിപ്പ് പ്രകാശനം  ഹെഡ്മാസ്റ്റർ സജി ജോൺ  നിർവഹിച്ചു. അധ്യാപകരായ ദീപ്തി എം.എസ്, മേബിൾ പോൾ എന്നിവർ  പ്രസ്തുത ദിന സന്ദേശം നൽകി. ഇതിനെ തുടർന്ന് നിരവധി ശാസ്ത്ര പ്രവർത്തനങ്ങൾ ക്ലാസ് തലത്തിൽ സംഘടിപ്പിക്കാൻ തീരുമാനിച്ചു.

അറിവിന്റെ നാളവുമായി അക്ഷരവെളിച്ചം പദ്ധതി ആരംഭിച്ചു

ദ്വാരക എ.യു.പി സ്കൂളിൽ അക്ഷരവെളിച്ചം പദ്ധതിക്ക് തുടക്കം കുറിച്ചു. എഴുതാനും വായിക്കാനും പിന്നാക്കക്കാരായ വിദ്യാർത്ഥികൾക്ക് ലേഖന, വായന ശേഷി കൈവരിക്കുന്നതിനായി അക്ഷര ക്രീഡയിലൂടെയും ,ചിത്രവായനയിലൂടെയും  അക്ഷരങ്ങളും ചിഹ്നങ്ങളും ഉറപ്പിക്കുക എന്ന ലക്ഷ്യത്തോടെയാണ് പദ്ധതി ആരംഭിച്ചത്. 



പ്രസ്തുത പദ്ധതി സ്കൂൾ മാനേജർ റവ.ഫാദർ ജോസ് തേക്കനാടി ഉദ്ഘാടനം ചെയ്തു. പി.റ്റി.എ പ്രസിഡന്റ് ശ്രീ.മനു കുഴിവേലിൽ, ഹെഡ്‌മാസ്റ്റർ  ശ്രീ .സജി ജോൺ, എക്സിക്യൂട്ടീവ് അംഗം സുരേഷ് കുമാർ എന്നിവർ ആശംസകൾ അർപ്പിച്ചു. അക്ഷര ദീപ നാളങ്ങളും ,അക്ഷര കാർഡുകളും, ചിത്രങ്ങളുമായി കുട്ടികൾ ആടിയും പാടിയും ആദ്യ ക്ലാസിനെ വരവേറ്റു. എല്ലാ പ്രവർത്തി ദിനങ്ങളിലും ക്ലാസ്സ് സമയത്തിനു ശേഷം വൈകിട്ട്  04:30 വരെയാണ് പ്രത്യേകം തയ്യാറാക്കിയ മൊഡ്യൂൾ ഉപയോഗിച്ചുള്ള  ഈ പരിശീലന പരിപാടി നടത്തപ്പെടുക.